1 Tawarikh 23

To Lewi dipapatui golongan sia dipatakoi pengkarangan 1

Iatonna matuamo tu Daud sia tarru’ matessekmo, natokkomi tu Salomo, anakna muane, dadi datunna to Israel;

2

anna popa’kombonganni tu mintu’ pangulu to Israel sia mintu’ to minaa sia mintu’ to Lewi.

3

Diia’mi tu to Lewi, iamotu mintu’ to sitallung pulo taunna sia la’bi na iato; mintu’i te muane diia’ simisa’-misa’, den tallungpulo ngkarua sa’bu.

4

Dio mai mintu’ tau iate duangpulo nna’pa’ sa’bu dipatakoi la ungkampai pengkarangan lan banuanNa PUANG; annan sa’bunna tu la diala parea sia to ma’paolai salu;

5

na patangsa’bu tu to ma’kampa babangan; na patangsa’bu tu la umpudi-pudi PUANG, tu la umpannonianni oni-onian, tu kusua unggaragai la dipopa’pudi-pudian.

6

Naboronganni dukami Daud tu tau iato mai, sisangtorroan urrundu’ bati’na Lewi, iamotu Gerson, sia Kehat sia Merari.

7

Iatu naala bilanganna Gerson, iamotu Ladan na Simei.

8

Iatu anakna Ladan iamotu Yehiel, tu pangulu, Zetam na Yoël, tallui;

9

iatu anakna Simei, iamotu Selomit, Haziel na Haran, tallui. Mintu’i te pangulunna bati’na Ladan.

10

Na iatu anakna Simei iamotu Yahat, Ziza, Yeush na Beria; iamoto tu anakna Simei, a’pa’i.

11

Iamotu Yahat pangulunna sia Ziza tu ma’penduanna, apa iatu Yeush sola Beria tae’ nabuda bati’na, iamoto nadipasibilang sola duai sangrapu na sanggolongan lan pengkarangan.

12

Iatu anakna Kehat iamotu Amram, Yizhar, Hebron na Uziel, a’pa’i.

13

Iatu anakna Amram iamotu Harun sola Musa; iatu Harun dipamarimbangan, kumua anna dipamaindan butung to tarru’ maindan, la ia la iatu mai anakna muane, la untunu pemala’ dio oloNa PUANG, la umpengkaolai sia ma’passakke tete dio sanganNa, sae lakona.

14

Iatu diona Musa, taunNa Puang Matua, dipaalaimo bilangan suku Lewi tu bati’na.

15

Iatu anakna Musa iamotu Gersom na Eliezer;

16

iatu bati’na Gersom iamotu Sebuel, tu pangulu.

17

Iatu bati’na Eliezer, iamotu Rehabya, tu pangulu; tae’ senga’na tu anakna muane Eliezer, apa iatu bati’na Rehabya buda liu.

18

Iatu bati’na Yizhar iamotu Selomit, tu pangulu;

19

iatu bati’na Hebron iamotu Yeria, tu pangulu; Amarya, tu ma’penduan; Yahaziel, tu ma’pentallun; Yekameam, tu ma’penna’pa’.

20

Iatu bati’na Uziel iamotu Mikha, tu pangulu Yisia, tu ma’penduan.

21

Iatu anakna Merari iamotu Mahli na Musi; na iatu anakna Mahli iamotu Eleazar na Kish.

22

Matemi tu Eleazar, tae’ nadadian muane, sangadi baine manna, iatu anakna Kish, sampu pissanna, napobaine.

23

Iatu anakna Musi iamotu Mahli, Eder na Yeremot, tallui.

24

Mintu’nate bati’na Lewi, ke dipasirundunanni rapunna – tonna diia’ tu pangulu rapunna sia disa’bu’ tu sanganna simisa’-misa’ –, tu untoe pentoean lan banuanNa PUANG, tu siduangpulomo taun dadinna ba’tu la’bi.

25

Belanna nakua Daud: Nakamaseimo karapasan PUANG, Kapenombanna to Israel, tu taunNa, sia torro dio Yerusalem tontong sae lakona.

26

Iamoto da’omo na to Lewi umbullei tu kema sola mintu’ pareanan dipake lan kamenomban.

27

Na iatu parentana Daud tu undinna, dipaalaimo bilanganna to Lewi tu tau siduang-pulomo taun dadinna ba’tu la’bi.

28

Na iatu tau iato mai bendan umbalii bati’na Harun dio kamenomban lan banuanNa PUANG sia ungkampai tu mai tarampak, sia iatu mintu’ bilik, sia untiroi tu kadipemaseroianna mintu’ apa maindan, sia umposara’i tu mintu’ pengkarangan diona kamenomban lan banuanNa Puang Matua;

29

sia roti dipennoloan, sia ta’pung mani’sak la digaragai kande dipemalaran, sia iatu pa’ranggina manipi’ tang diragii, sia bassi pantunuan roti, sia ta’pung dipasigerok minna’, sia mintu’ kararo sia sukaran.

30

Sia manassa la bendan ke melambi’oi sia tumaya ke makaroennoi la umpudi sia umpakaraya PUANG,

31

susi dukato, ke dipennoloanni tu mintu’ pemala’ ditunu pu’pu’ lako PUANG, ke allo katorroan, bulan ba’ru sia allo kapua, la tontong bendan dio oloNa PUANG pada budanna tu mangka dipamanassa lako tau iato mai.

32

La untoe pentoeanna dio Tenda Kasitammuan la ungkampai inan maindan sia la umbalii bati’na Harun, siulu’na tau iato mai, diona kamenomban lan banuanNa PUANG.

alkitab.me